கொரோனா தொற்று காரணமாக அரசு ஊழியர்களுக்கு அமல்படுத்தப்பட்டிருந்த தடைகள் விலக்கிக் கொள்ளப்படுவதாக நிதித்துறை முதன்மை செயலாளர் உதயசந்திரன் ஐஏஎஸ் உத்தரவு பிறப்பித்துள்ளார். இதனால் தமிழக அரசு ஊழியர்கள் மிகுந்த மகிழ்ச்சியில் ஆழ்ந்துள்ளனர்.
தமிழகத்தில் கொரோனா பெருந்தொற்று காரணமாக மாநில அரசு பல்வேறு சிக்கன நடவடிக்கைகளை மேற்கொண்டு வந்தது. ஏனெனில் நோய்த்தொற்றில் இருந்து மக்களை பாதுகாக்க, மருத்துவ உள்கட்டமைப்பு வசதிகளை மேம்படுத்த கூடுதல் நிதி ஒதுக்கீடு செய்ய வேண்டியிருந்தது. இதன் காரணமாக அரசு ஊழியர்களுக்கு சில சலுகைகள் தற்காலிகமாக மறுக்கப்பட்டன.
இது 2020-21ஆம் நிதியாண்டில் இருந்து அமலுக்கு வந்தது. அதாவது, அனைத்து அரசு துறைகளிலும் சிக்கன நடவடிக்கைகள் மேற்கொள்ளப்பட்டன. கொரோனா தொற்று நீங்கிய பின்னரும் தடைகள் விலக்கி கொள்ளப்படவில்லை. கடந்த இரண்டு நிதியாண்டுகளாக தமிழகத்தில் அமலில் இருந்தன.
இந்நிலையில் நடப்பு நிதி நிலைமையில் முன்னேற்றம் ஏற்பட்டிருப்பதால் தமிழக அரசு ஊழியர்களுக்கு விதிக்கப்பட்டிருந்த தடைகள் விலக்கி கொள்ளப்படுவதாக நிதித்துறை முதன்மை செயலாளர் உதயசந்திரன் ஐஏஎஸ் உத்தரவு பிறப்பித்துள்ளார். கொரோனா பெருந்தொற்று காலத்திற்கு முன்பு, என்னென்ன நடைமுறைகள் அமலில் இருந்ததோ அவை மீண்டும் பயன்பாட்டிற்கு வருகிறது.
அதன்படி, அரசு ஊழியர்கள் விமானங்களில் பயணம் மேற்கொள்ள விதிக்கப்பட்டிருந்த தடை விலக்கப்பட்டது. தினசரி படி தொகையும் முன்பை போல வழங்கப்படும். மேலும் அரசு ஊழியர்களின் பொது பணியிட மாறுதல் வழக்கம் போல் நடைபெறும். இதனால் பணியிட மாறுதலுக்கு காத்திருக்கும் அரசு ஊழியர்கள் பெரிதும் மகிழ்ச்சி அடைந்துள்ளனர்.
மேலும் அலுவலக ரீதியில் விமானப் பயணங்களை மேற்கொள்ளலாம். அதேசமயம் சிக்கன நடவடிக்கைகளை தொடரும் வகையில் சில தடைகள் அப்படியே தொடரும் எனத் தெரிவிக்கப்பட்டுள்ளது. அதன்படி, புதிய அலுவலகங்கள் திறக்கும் போது மட்டும் போதிய உபகரணங்களை வாங்கலாம். தற்போது பயன்பாட்டில் இருக்கும் அலுவலகங்களுக்கு புதிய தளவாட சாமான்கள் வாங்க அனுமதியில்லை.
அத்தியாவசிய துறைகளாக கருதப்படும் சுகாதாரம் மற்றும் குடும்ப நலத்துறை, தீயணைப்பு மற்றும் பாதுகாப்பு சேவை ஆகிய துறைகளுக்கு மட்டுமே அத்தியாவசிய கருவிகளை கொள்முதல் செய்யலாம். மற்ற துறைகளுக்கு அனுமதி இல்லை. அரசு துறைகளில் புதிய வாகனங்களை வாங்குவதற்கு அனுமதி கிடையாது.
ஒருவேளை பழுதடைந்த வாகனங்களாக இருந்தால் புதிதாக வாங்கி கொள்வதற்கு அனுமதி வழங்கப்படுகிறது. இத்தகைய நடைமுறைகள் நடப்பு 2023-24ஆம் நிதியாண்டில் அமலுக்கு வருகிறது. இவற்றை மிகவும் கண்டிப்பான முறையில் ஒவ்வொரு துறை தலைவர்கள் மற்றும் அதிகாரிகள் கடைபிடிக்க வேண்டும் எனக் கேட்டுக் கொள்ளப்பட்டுள்ளது.
இதுதொடர்பாக உரிய வழிகாட்டுதல்களை ஒவ்வொரு துறை செயலாளர்கள் தங்களின் உயர் அதிகாரிகளுக்கு பிறப்பிக்க வேண்டும் என்று நிதித்துறை முதன்மை செயலாளர் உதயசந்திரன் ஐஏஎஸ் குறிப்பிட்டுள்ளார். இந்த உத்தரவு அரசு ஊழியர்கள் மத்தியில் மிகவும் கவனம் பெற்றுள்ளது.