நாளை முதல் 500 மதுபானக்கடைகள் மூடப்படும் – தமிழ்நாடு அரசு அறிவிப்பு

பள்ளி, கல்லூரிகள், வழிபாட்டுத்தளங்களுக்கு அருகே செயல்பட்டு வரும் 500 மதுபானக்கடைகளை மூடுவதாக அறிவித்திருக்கிறது தமிழ்நாடு அரசு

தமிழ்நாடு முழுவதும் 500 மதுபானக்கடைகளை மூடுவதாக தமிழ்நாடு அரசு அறிவித்திருக்கிறது. இதுகுறித்து வெளியிட்டுள்ள அறிக்கையில் “முதல்வரின் உத்தரவுக்கு இணங்க மின்சாரம், மதுவிலக்கு மற்றும் ஆயத்தீர்வைத் துறை அமைச்சரால் சட்டப்பேரவையில் மதுவிலக்கு மற்றும் ஆயத்தீர்வை மானியக் கோரிக்கையின் போது 500 மதுபான சில்லறை விற்பனைக் கடைகள் கண்டறியப்பட்டு மூடப்படும் என்று அறிவிக்கப்பட்டது.

மேற்படி, அறிவிப்பிற்கிணங்க 500 மதுபான சில்லறை விற்பனைக் கடைகளைக் கண்டறிந்து மூடிட 20.04.2023 நாளிட்ட அரசாணை எண்.140, மதுவிலக்கு உள் மற்றும் ஆயத்தீர்வை துறை வெளியிட்டது.

மேற்படி, அரசாணையை செயல்படுத்தும் விதமாக மாநிலம் முழுவதும் உள்ள மதுபான சில்லறை விற்பனைக் கடைகளில் 500 கடைகளைக் கண்டறிந்து அவற்றை 22.6.2023 அன்று முதல் மூட உத்தரவு பிறப்பிக்கப்பட்டுள்ளது. அதனடிப்படையில், மேற்குறிப்பிட்ட 500 மதுபான சில்லறை விற்பனைக் கடைகள் 22.6.2023 முதல் செயல்படாது என்று தெரிவித்துக் கொள்ளப்படுகிறது” என அதில் குறிப்பிடப்பட்டு உள்ளது.