பொறியியல் படிப்பிற்கான ஆன்லைன் விண்ணப்ப பதிவை தொடங்கி வைத்த அமைச்சர் பொன்முடி, ஆகஸ்ட் 2ம் தேதி கலந்தாய்வு நடைபெறும் என தெரிவித்தார்.
தமிழ்நாடு முழுவதும் பொறியியல் படிப்பிற்கான ஆன்லைன் விண்ணப்ப பதிவை உயர்கல்வி அமைச்சர் பொன்முடி தொடங்கிவைத்தார். மாணவர்கள் மே 5 முதல் ஜூன் 4 வரை விண்ணப்பிக்கலாம். www.tneaonline.org எனும் இணையதளம் மூலமாக விண்ணப்பிக்கலாம்.
ஆன்லைன் விண்ணப்ப பதிவை தொடங்கிவைத்தப் பின் செய்தியாளர்களிடம் பேசிய அமைச்சர் பொன்முடி “பொறியியல் கலந்தாய்வு ஆகஸ்ட் 2ல் தொடங்குகிறது. பொதுப்பிரிவு கலந்தாய்வு ஆகஸ்ட் 7 அன்று தொடங்கும். மொத்தம் 4 கட்டங்களாக பொறியியல் கலந்தாய்வு நடக்கும், அக்டோபர் 3ம் தேதி வரை நடைபெறும்.
தமிழ்நாட்டில் 164 அரசு கலை அறிவியல் கல்லூரிகள் உள்ளன. 2023-24 ம் மாணவர் சேர்க்கை விண்ணப்ப பதிவு மே 8-ம் தேதி தொடங்கும். மே 19 வரை விண்ணப்பிக்கலாம். மொத்த 1,07,395 இடங்கள் உள்ளன.
2,98,400 பேர் கடந்த ஆண்டு விண்ணப்பித்துள்ளனர். இனி அரசு கலை அறிவியல் கல்லூரிகளுக்கு தனித்தனியாக விண்ணப்ப கட்டணம் செலுத்த தேவையில்லை. 5 கல்லூரிகள் வரை விண்ணப்பிக்கும் போது 50 ரூபாய் மொத்தமாக செலுத்தினால் போதும். 5 கல்லூரிகளுக்கு மேல் விண்ணப்பிக்கும் போது கூடுதல் 50 தனித் தனியாக செலுத்தவேண்டும். www.tngasa.in என்ற இணையதள முகவரியில் கலை அறிவியல் படிப்புகளுக்கு விண்ணப்பிக்கலாம்.” என தெரிவித்தார்.