2024 நாடாளுமன்ற தேர்தலில் பாஜகவை வீழ்த்த 17 எதிர்கட்சிகள் ஒன்றிணைந்து நடத்திய ஆலோசனைக் கூட்டம் பாட்னாவில் நடைபெற்றது.
2024ம் ஆண்டு மக்களவை தேர்தல் நடக்க இருக்கிறது. இந்த தேர்தலில் பாஜகவை வீழ்த்த காங்கிரஸ் உள்ளிட்ட பாஜகவுக்கு எதிரான கட்சிகள் ஒன்றிணைந்து செயல்படுவதற்காக திட்டத்தை வகுக்க ஆலோசனைக் கூட்டம் இன்று பாட்னாவில் நடந்தது. பீகார் முதல்வர் நிதிஷ் குமாரின் அழைப்பின் பேரில் நடைபெற்ற இந்த ஆலோசனைக் கூட்டத்தில் காங்கிரஸ் தலைவர் மல்லிகார்ஜுன கார்கே, காங்கிரஸ் முக்கியத் தலைவர் ராகுல் காந்தி, மேற்கு வங்க முதல்வர் மம்தா பானர்ஜி, தமிழ்நாடு முதல்வர் மு.க.ஸ்டாலின், ஜார்க்கண்ட் முதல்வர் ஹேமந்த் சோரன், டெல்லி முதல்வர் அரவிந்த் கேஜ்ரிவால், சமாஜ்வாதி கட்சித் தலைவர் அகிலேஷ் யாதவ், தேசியவாத காங்கிரஸ் தலைவர் சரத் பவார், சிவ சேனா தலைவர் உத்தவ் தாக்கரே உள்ளிட்டோர் அரசியல் கட்சி தலைவர்கள் கலந்து கொண்டனர்
மக்களவைத் தேர்தலை எவ்வாறு எதிர்கொள்ள வேண்டும் என்பது தொடர்பாக தலைவர்கள் பலரும் தங்கள் கருத்துக்களைப் பகிர்ந்து கொண்டனர். 4 மணி நேரம் நடைபெற்ற இந்த ஆலோசனைக் கூட்டம் நிறைவடைந்ததை அடுத்து, தலைவர்கள் அனைவரும் செய்தியாளர்களைச் சந்தித்தனர். அப்போது பேசிய நிதிஷ் குமார். “இந்த ஆலோசனைக் கூட்டம் நல்ல முறையில் நடந்தது. பல்வேறு தலைவர்களும் தங்கள் கருத்துகளைத் தெரிவித்தனர். வரும் மக்களவைத் தேர்தலை 17 கட்சிகளும் ஒருங்கிணைந்து எதிர்கொள்வது என்ற முடிவு இந்தக் கூட்டத்தில் எடுக்கப்பட்டுள்ளது” எனத் தெரிவித்தார்.
காங்கிரஸ் தலைவர் மல்லிகார்ஜுன கார்கே : “எதிர்க்கட்சிகளின் அடுத்தக் கூட்டம் இமாச்சலப் பிரதேச தலைநகர் ஷிம்லாவில் அடுத்த மாதம் நடைபெறும். நாடாளுமன்றத் தேர்தலை இணைந்து எதிர்கொள்வதற்கு ஏற்ப பொதுத் திட்டத்தை வகுக்க நாங்கள் முடிவெடுத்துள்ளோம். இதனை எவ்வாறு முன்னெடுத்துச் செல்வது என்பது குறித்து அடுத்த கூட்டத்தில் முடிவெடுப்போம். இணைந்து செயல்படுவதற்கு ஏற்ப ஒவ்வொரு மாநிலத்திற்கும் தனித்தனியான திட்டங்களை வகுத்து செயல்படுவோம். மத்தியில் உள்ள பாஜகவை வீழ்த்துவதே எங்கள் இலக்கு” எனத் தெரிவித்தார்.
ராகுல் காந்தி : “எதிர்க்கட்சிகளுக்குள் சில கருத்து வேறுபாடுகள் இருந்தாலும், நாங்கள் ஒன்றிணைந்து தேர்தலை எதிர்கொள்வோம். நெகிழ்வுத்தன்மையுடன் பணியாற்றி, எங்கள் சித்தாந்தத்தை பாதுகாப்போம்” என தெரிவித்தார்.
மேற்கு வங்க முதல்வர் மம்தா பானர்ஜி : நாங்கள் இணைந்துள்ளோம். இணைந்தே போட்டியிடுவோம். வரலாறு இங்கிருந்து துவங்குகிறது. வரலாறு மாற்றப்பட வேண்டும் என பாஜக விரும்புகிறது. ஆனால், வரலாறு பாதுகாக்கப்பட வேண்டும் என்று நாங்கள் விரும்புகிறோம். இந்த பாசிச அரசுக்கு எதிராக பேசுவதே எங்களின் நோக்கம்.”
சிவசேனா தலைவர் உத்தவ் தாக்கரே : எங்களுக்குள் சித்தாந்த வேறுபாடுகள் இருக்கின்றன. ஆனால், நாட்டின் பன்முகத்தன்மையையும் ஒருமைப்பாட்டையும் பாதுகாக்க நாங்கள் ஒன்றிணைந்துள்ளோம்.”
டெல்லி அரசின் அதிகாரம் தொடர்பான மத்திய அரசின் அவசரச் சட்டத்திற்கு காங்கிரஸ் கட்சி வெளிப்படையாக எதிர்ப்பு தெரிவிக்காததால் ஆம் ஆத்மி கட்சி அதிருப்தியை வெளிப்படுத்தி உள்ளது.
இது தொடர்பாக அக்கட்சி வெளியிட்டுள்ள அறிக்கையில், “மத்திய அரசின் கருப்புச் சட்டம் மாநிலங்களவையில் தோற்கடிக்கப்பட வேண்டும். இந்த சட்டத்தை காங்கிரஸ் கட்சி இதுவரை வெளிப்படையாக எதிர்க்கவில்லை. இது அதன் உள்நோக்கத்தை வெளிப்படுத்துகிறது. மாநிலங்களவையில் உள்ள எங்கள் கட்சியின் 31 எம்பிக்களும் இந்த சட்டத்தை எதிர்த்து வாக்களிப்பார்கள் என்று காங்கிரஸ் கட்சி ஏன் அறிவிக்க மறுக்கிறது? காங்கிரஸ் கட்சி இவ்வாறு செயல்படும் நிலையில், எதிர்க்கட்சிகளின் அடுத்த கூட்டத்தில் ஆம் ஆத்மி பங்கேற்பது கடினம்” எனத் தெரிவித்துள்ளது.